والله كان حقي فعلا أخدتلي كلاسين ولا تلاتة من الي نادي القدس الفلسطيني في الجامعة الأمريكية كانوا بيدوهم وقت ما كنت طالب.. كان حقي استغليت وقت فراغي بشكل أحسن، وعلى الأقل كنت اتعلمتلي حركتين تلاتة… أنا بحب الدبكة الفلسطينية جدا بس ما بعرفش أرقصها.. لكن باحب أقعد أتفرج عليها وأصور الراقصين والراقصات الي بيأدوها على المسرح… بحس فيها بحيوية كدة وحلاوة وروح جميلة ومقاومة صلبة… وبالرغم من كل حين لآخر أقابل صديق يعرض خدماته في تعليمي الدبكة الفلسطينية أو اللبنانية لكن بأحس ان عموما خلاص، مضى قطار العمر وشاب الغلام وتهدلت الأكتاف وتقرقشت الركب وإشرأبت الفقرات وإنبعجت الفلنكات والواحد خلاص مش حيقعد يتعلم يرقص دلوقتي لا دبكة ولا صلصلة ولا طانجو.. كفاية عليا رقصة المطاوي بتاعة الإسماعيلية أو رقصة فرارجية مدينة نصر…
أسيبكوا بقى مع شوية صور لحبايبنا الفلسطينيين في سان فرانسيسكو…